As vasoiras do noso Samaín!

 O Samaín está a piques de chegar ao noso cole e xa temos preparada unha exposición moi especial! 

Este ano, desde o equipo de Dinamización da Lingua Galega, escollemos como temática os seres mitolóxicos da tradición galega, como as meigas, os chupasangues, os lobishomes e outros personaxes cheos de misterio que forman parte das nosas lendas e traidicións.

Para completar esta celebración e implicar tamén as familias, propuxémosvos elaborar en familia vasoiras de Samaín orixinais e creativas. E o resultado non podía ser máis espectacular!

Xa podemos gozar dunha exposición chea de vasoiras únicas, elaboradas con moita imaxinación e ilusión, que enchen o noso cole de maxia e ambiente de Samaín. Queremos agradecer ás familias a súa colaboración e participación nesta iniciativa, que nos permite compartir momentos especiais e manter viva a nosa cultura.

Mañá festexaremos o Samaín no colexio, así que xa está todo preparado para vivir unha xornada terrorificamente divertida!

Moitas grazas a todas as familias por facer posible esta exposición tan especial! 💚

Chega o Samaín ao Covasmola

Esta semana, o alumnado de Educación Infantil está a mergullarse no mundo máxico do Samaín, descubrindo algúns dos seres máis característicos da nosa tradición galega: os trasnos, as meigas, a Santa Compaña e outros personaxes cheos de misterio e lendas. 

A través de diferentes actividades, as nenas e os nenos están coñecendo un pouco máis o noso patrimonio cultural e as historias que forman parte da tradición popular galega. 

E isto non remata aquí! Este venres 30 festexaremos o Samaín no cole e poderemos vir disfrazados de seres propios desta temática, como meigas, trasnos, ánimas, Santa Compaña...

Estamos desexando ver eses disfraces!

Visita á Granxa Holstein - Barreiros

O alumnado de 3º e 4º de Educación Primaria realizou hoxe unha visita á Granxa Holstein, en Barreiros, grazas á colaboración e organización da ANPA do centro.

Durante a visita, tivemos a oportunidade de coñecer de preto o funcionamento dunha explotación gandeira e todo o proceso relacionado coa produción de leite. Puidemos observar as vacas, coñecer como se realiza a obtención do leite e descubrir as diferentes etapas que forman parte da elaboración do queixo.

Agradecemos á ANPA a súa colaboración e implicación nesta actividade, que nos permitiu gozar dunha xornada de aprendizaxe, descubrimento e diversión!

I Xuntanza - 6º de primaria

Hoxe tivemos o pracer de celebrar no noso centro a I XUNTANZA do alumnado de 6º de Educación Primaria dos centros de Viveiro e o Vicedo. Os nenos e nenas desfrutaron dunha xornada de actividades onde tiveron a oportunidade de coñecerse un pouquiño máis. 

Moita sorte nesta nova etapa!

Bágoas da Terra

Hoxe tivemos no noso centro a visita da asociación Bagoas da Terra, que nos ofreceu unha actuación chea de música, tradición e cultura galega.  

Un grupo de nenos e nenas achegouse ao colexio para interpretar e bailar diferentes pezas musicais.

O alumnado gozou moito desta actividade, que nos permitiu achegarnos un pouco máis á riqueza da nosa música e das nosas tradicións!

O charlatán de Covas - Edición 2025 - 26

 Xa está aquí unha nova edición de O Charlatán de Covas!  

No noso xornal anual recompilamos algunhas das experiencias, actividades e momentos máis destacados vividos ao longo deste curso escolar. Nel poderedes atopar novidades, proxectos realizados polo alumnado, saídas, celebracións, entrevistas, propostas educativas e moitas outras iniciativas que forman parte do día a día do noso centro.  

Convidámosvos a descubrir este novo número, elaborado con moita ilusión, no que recollimos unha pequena mostra de todo o aprendido, compartido e desfrutado durante este curso. Agardamos que vos guste!

Charlatán De Covas 25- 26

Publish at Calameo

DÍA DAS LETRAS GALEGAS

Con motivo da celebración das Letras Galegas e tomando como inspiración a figura de Begoña Camaño,  naceu no noso centro O PODCAST COVASMOLA.

Creamos un pequeno espazo de gravación na biblioteca do centro, transformándoa nun auténtico estudio radiofónico por uns días. Ao longo da xornada, cada curso foi realizando diferentes entrevistas a membros da comunidade educativa, abordando temas diversos e de gran interese. Ademais, tamén contamos coa participación das familias e do alumnado dende as súas casas, elaborando entrevistas a persoas da súa contorna sobre profesións, experiencias e temas da súa elección.  

A continuación, deixamos o enlace para acceder a todas as entrevistas realizadas, tanto as gravadas no centro como as elaboradas dende a casa.  

CANLE PODCAST COVASMOLA: https://www.youtube.com/playlist?list=PLEg2thi3lWZUIBtCZLhxv4CS5dpWybJky

Para completar esta celebración tan especial, quixemos render homenaxe tamén á nosa bandeira. O alumnado de Primaria acudiu vestido de branco e o alumnado de Infantil de azul para representar a bandeira de Galicia no patio do centro. Con todos e todas xuntos realizouse unha fotografía con vista aérea que deixamos a continuación como recordo desta xornada dedicada á nosa lingua e á nosa cultura.

FELIZ DÍA DAS LETRAS GALEGAS!

Sinfonía de Contos - Inma e Tamara Soto

Con motivo da celebración das Letras Galegas, no noso centro tivemos a sorte de recibir a visita da contacontos Inma Soto e da clarinetista Tamara Soto co seu espectáculo Sinfonía de Contos.

Trátase dun espectáculo moi especial no que se combina o relato oral galego coa música e os efectos sonoros, creando unha experiencia única !

O alumnado gozou moito desta actividade, participando con entusiasmo e interese en todo momento. Sen dúbida, foi unha experiencia diferente e moi divertida tanto para os nenos e nenas como para as mestras.

Grazas por este ratiño de CONTAR e CANTAR!

Exposición Letras Galegas - Begoña Caamaño

Co motivo da celebración das Letras Galegas, no noso centro contamos cunha exposición dedicada á figura de Begoña Camaño, autora homenaxeada este ano.

Esta mostra foi instalada nas escaleiras do centro co obxectivo de que todo o alumnado poida achegarse a ela e gozar do seu contido ao longo da xornada escolar. A través desta exposición, dáse a coñecer a súa traxectoria tanto no ámbito persoal como profesional, permitindo descubrir a relevancia da súa figura.

Achéganse as Letras Galegas...

Carapuchiña vermella - 3º de primaria

Con motivo do día do libro, o alumnado de terceiro de Primaria levou a cabo unha pequena obra de teatro baseada no conto tradicional da Carapuchiña Vermella, mais cunha versión diferente e moi especial. Ao longo da representación, os nenos e nenas deron vida aos  personaxes do conto, interpretándoos dunha forma orixinal e sorprendente que non deixou indiferente ao público!

Esta actividade foi representada tanto para o alumnado do centro como para as familias dos protagonistas, que puideron gozar do traballo realizado e da ilusión dos nenos e nenas!

Cómpre destacar que este conto está adaptado con pictogramas a través do programa Escolas Visuais, o que contribúe a facelo máis accesible e inclusivo para todo o alumnado.

Vaia espectáculo! 

A ra pirata - Día do libro 2026

Para conmemorar o Día do Libro, o departamento de orientación creou unha adaptación do conto con Pictogramas de "Escuelas Visuales" A ra pirata. Noraboa por este traballazo!

Feliz día do Libro! 📚

Obradoiro lettering 4º primaria

 Hoxe, día 7 de abril, os nenos e nenas de 4º de Educación Primaria desfrutaron dun obradoiro de lettering organizado polo equipo da biblio. Grazas a Nacu, o alumnado achegouse ao mundo das letras dun xeito creativo. Ao longo da sesión, practicamos diferentes tipos de trazos e letras e experimentamos coa escritura artística. 

RUTA COVASMOLA

Despedimos o segundo trimestre cunha ruta pola contorna onde participou toda a comunidade educativa: alumnado, familias e mestr@s. Qué ben o pasamos!